பனியே இல்லாமல் 22 டிகிரி குளிரில் நடுங்கும் சென்னை: காரணம் என்ன?

வங்கக்கடலில் நிலவும் காற்றழுத்தத் தாழ்வு மண்டலத்தால் சென்னையில் வெப்பநிலை 22°C - 24°C ஆகக் குறைந்துள்ளது. பலத்த காற்று மற்றும் லேசான தூறலுடன் கூடிய இந்த 'மலைப்பிரதேச' வானிலை திங்கட்கிழமை வரை நீடிக்க வாய்ப்புள்ளது.

வங்கக்கடலில் நிலவும் காற்றழுத்த தாழ்வு மண்டலம் காரணமாக, சென்னை மற்றும் அதன் சுற்றுவட்டார பகுதிகளில் குளிர்ச்சியான வானிலை நிலவி வருகிறது. கோடை வெயிலுக்கு பெயர்போன சென்னையில், தற்போது நிலவும் இந்த 'மிதமான குளிர்காலம்' பொதுமக்களை வியப்பிலும் மகிழ்ச்சியிலும் ஆழ்த்தி உள்ளது.

சென்னையில் இன்று காலை வெப்பநிலை 22°C-ஆகக் குறைந்து காணப்பட்டது. பகல் நேரத்திலும் அதிகபட்ச வெப்பநிலை 24°C என்ற அளவிலே நீடித்தது. நகரின் பல பகுதிகளில் மேகமூட்டத்துடன் கூடிய லேசான தூறல் மற்றும் மணிக்கு 45 கி.மீ வேகத்தில் பலத்த காற்று வீசி வருகிறது. இதுகுறித்து வானிலை ஆர்வலர்கள் கூறுகையில், "சென்னையில் இது அரிதான 'ஹில் ஸ்டேஷன்' போன்ற வானிலை. தற்போது நிலவும் இந்தத் தூறல் மற்றும் மேகமூட்டம் நாளையும் தொடர வாய்ப்புள்ளது. பகல் நேர வெப்பநிலை இயல்பை விட மிகக் குறைவாகவே இருக்கும்," எனத் தெரிவித்துள்ளனர்.

தமிழகத்தின் டெல்டா மாவட்டங்களில் சுமார் 85 மி.மீ வரை பலத்த மழை பெய்துள்ளது. அறுவடைக்குத் தயாராக இருந்த பயிர்களுக்குப் பாதிப்பு ஏற்படாத வகையில், மிதமான மழையாக பெய்துள்ளது விவசாயிகளிடையே நிம்மதியை ஏற்படுத்தியுள்ளது. மழையானது தமிழகத்தின் உட்புற மாவட்டங்கள் மற்றும் கொங்கு மண்டலத்தை நோக்கி நகரக்கூடும். அங்கேயும் நல்ல மழைக்கு வாய்ப்புள்ளது. புதன் கிழமை முதல் தமிழகம் முழுவதும் மழையிலிருந்து ஒரு முழுமையான இடைவெளி கிடைக்கும் என எதிர்பார்க்கப்படுகிறது.

காற்றழுத்தத் தாழ்வு நிலை விலகிய பிறகு, பொங்கல் பண்டிகையை ஒட்டி இரவு மற்றும் அதிகாலை நேரங்களில் கடும் குளிர் நிலவும். அடுத்த இரண்டு வாரங்களுக்கு இந்த நிலை நீடிக்கலாம். இருப்பினும், மதிய நேரங்களில் மீண்டும் வெப்பம் அதிகரிக்கத் தொடங்கும். திடீரென நிலவும் இந்தக் கடும் குளிரால் வீட்டின் தரை சில்லென்று மாறியிருப்பதாகவும், பலத்த காற்றினால் வேட்டி கட்டிக்கொண்டு இருசக்கர வாகனத்தில் செல்வது பெரும் சவாலாக இருப்பதாகவும் பொதுமக்கள் சமூக வலைதளங்களில் நகைச்சுவையாகப் பகிர்ந்து வருகின்றனர். சென்னை மற்றும் தமிழகத்தின் சில பகுதிகளுக்கு திங்கட்கிழமை வரை 'மஞ்சள் எச்சரிக்கை' (Yellow Alert) விடுக்கப்பட்டுள்ளது குறிப்பிடத்தக்கது.